Chicken Fajita Pizza Recipe in Urdu, Hindi

Duniya bher mein pasand ki janay wali aik dish pizza hai. Bachay hoon ya baray, sub he log pizza ko pasand kertay hain aur nuhayat shauq say khatay hain. Mukhtalif mumalik mein pizza ko mukhtalif kisam ki toppings k sath tayyar kia jata hai. Arab mumalik mein Arabic andaaz mein, Europi mumalik mein European andaaz mein aur Asia mein Asian andaaz mein. Iss terha zaida local log pizza ko pasand kertay hain kiyun k unko rawaiti andaaz aur zaiiqa bhi sath sath milta hai.

Ajj hum aap kay sath chicken fajita pizza recipe share ker rahay hain. Who tamaaam kahawateen jo apnay aur apnay ghar waloon ka dil cooking kay zariya jeetna chahti hain who mukhtalif recipes try kerti hain aur pizza bhi aik khas dish hai jis ko bnanay k liye khaasi maharat darkaar hoti hai. Umeed hai zail emin darj chicken fajita pizza ki recipe apko pasand aye gi aur ap zaroor try karain gi.

Chicken Fajita Pizza Ajza (ingredients):

Chicken breast(murghi ka seena): 1 chotay slices ker lain

Lehson ka paste(garlic paste): ½ teaspoon

Kuti hooi laal mirch(crushed red chili): ½ teaspoon

Curry powder: ½ teaspoon

Leemoon ka rus: 1 tablespoon

Namak: ½ teaspoon

Worcestershire sauce:1 tablespoon

Chilli garlic sauce – 1 tablespoon

Payaz chokor tukroon mein kati hoi(Cubes of onion):  ¼ cup

Mushrooms: 4 sliced

Kalay zaitoon (Black olives): 4 sliced

Oregano leaves – 1 teaspoon

Pizza sauce: 3 to 4 tablespoon

Mozzarella cheese: 3/4 cup

Cheddar cheese: 3/4 cup

Ingrediants for Pizza Dough:

Maida(flour): 2 cups

Cheeni(sugar): 1 teaspoon

Khameer(yeast): 1 teaspoon

Anda(egg): 1

Oregano: ½ teaspoon

Namak(salt): 1 teaspoon

Zaitoon ka tail(olive oil): 1 tablespoon

Khushk doodh(milk powder): 1 tablespoon

Neem garam pani(luke warm water): ½ cup

Chicken Fajita Pizza Tarkeeb (method):

Sub say pehlay khameer aur cheeni ko neem garam paani mein mix ker k phoolnay(to rise) kay liye rakh dain. 10 miinute mein yeh amal mukammal ho jaye ga. Ab mayday(flour) mein namak, anda, oregano, zaitoon ka tail, khushk doodh aur khameer wala pani mila lain aur achi terha goondh lain. Ab isko room temperature per dhaanp ker 2 say 3 ghantay k liye rakh dain ta kay aata phool jaye aur do guna (double) ho jaye.

Pizza Sauce:

Ingredients(ajza):

Payaaz(onion): 1(medium) darmiyanay size ka

Tomato ketchup: 2 tablespoon

Tail(oil): 3 teaspoon

Tamater(tomato): 5

Lehson(garlic): 1 say 2 pieces

Kuti (crushed)hoi laal mirch: ½ teaspoon

Namak(salt): hasb e zaroorat (As required)

Oregano: ¼ teaspoon

Tarkeeb(method):

Aik daigchi mein tail (oil) daal ker payaz aur lehson daal ker fry ker lain. Jub payaz naram ho jain tou tamater daal dain. Ab is mein namak, laal mirch aur tomato ketchup bhi shamil ker dain aura achi terha mix ker lain. Ab is mein oregano dal ker paknay k liye rakh dain. Ager paani daalnay ki zaroorat mehsoos karain toou thora sa paani shamil ker lain aur darmiyani aanch per pakaain. Tamater bilkul mix ho ker chatni ki shakal ikhtiyaar ker lain tou samajh lijiye pizza sauce tayyar hai. Ab is ko thanda ker lain.

Fajita Pizza: Tarkeeb(method):

Chicken kay tukroon mein namak, leemoon ka rus, lehson ka paste, Worcestershire sauce, chili garlic sauce, curry powder aur kuti hoi laal mirch daal ker mix ker lain. 10 say 15 minute tuk rakh lain. Ab aik pan lay ker tail dalain aur chicken daal ker chicken ko taiz aanch per achi terha paka lain. Jub tayyar ho jaye tou thanda ker lain.

Ab  pizza kay dough ko bail ker pizza tray mein laga lain aur ooper say pizza sauce bhi phaila dain. Opper say chicken k tukray, shimla mirch, musrooms, zaitoon daal dain aur oregano chirak dain. Aur aakhir mein cheese daal ker 240 degree centigrade per bake ker lain. Mazedaar chicken fajita pizza tayyaar hai.

Garam garam paish karain aur daad wasool karain.

Comments are closed.

Translate »