Face Totkay Upay – Chehray Kay Liye Upay

Chehray Kay Liye Totkay- Face Totkay

Khobsorat aur haseen chehra her aurat ka khawab hota hai. Bohut si khawateen apnay chehray ki jild ki hifazat mein koi asr utha nahi rakhti. Woh na sirf qudrati totkay aur tips ka istemaal kerti hain balkay bohut si beauty products ka istemaal bhi kerna munasib samajhti hain. Magar khoobsorat aur haseen chehra sirf gora rang hee nahi hota. Achi aur sehat mand jild khoobsoorti ka aina daar hoti hai. Jild ki khoobsoorti k liye larkiyan bayshummar totkay aazmati hain aur matlooba nataaij bhi hasil kerti hain.

Her insan ki jild mukhtalif hoti hai aur isi terha uskay masaail bhi mukhtalif hotay hain. Kisi kijild chikni hoti hai aur kisi ki khushk. Isi liye her aik ko apni apni jild ki munasibat say beauty products aur totkoon ka istemaal kernaa perta hai. Aaj hum apkay sath chehray say mutalik muktif masail aur unkay hal kay liye aazmooda totkay share kernay ja rahay hain. Umeed hai apko faida ho ga.

Chehray kay daag dhabbay door kernay kay liye totkay:

Chehray kay daag dhabbay door kernay kay liye azmooda totkay darj zail hain:

  • Lemon kay chilkay ko khushk ker kay pees lain aur doodh mein mila ker chehray per raat bher kay liye lagain. Subah uth ker chehra doh lain.
  • Taza doodh mein glycerin kay kuch drops mila ker laganay say bhi chehray kay dagh dhabbay door ho jatay hain.
  • Balaai mein lemon juice mila ker laganay say chehray kay daag dhabbay kum ho jatay hain.

Chehray kay faalto baal:

  • Baisan ko pani mein ghol ker paste bna lain aur chehray per lagain. Kuch dair kay baad hath say ragar ker utaar lain. Chehray kay faalto baal kum ho jain gay.
  • Paani mein namak mila ker sooti kapray ki madad say chehray per malain. Aik haftay kay istemaal kay baad ferq nazar aiye ga.

Chehray ki rangat ka nikhaar:

  • Aik aaloo lain aur isko kuchal lain ya pees lain. Phir is ko aik kapray per phaila ker chehray per lagain. 30 minutes k baad hata dain aur raat bher k liye chor dain. Subah uth ker chehray ko saaf paani say dho lain.
  • Gaajar aur shaljam ko paani mein udaal ker kuchal lain aur 30 minutes kay liye iss amaizay ko chehray per laga lain. 30 minutes kay baad roi ko doodh mein bhigo ker chehra saf ker lain. Chehray ki rangat khil uthay gi.
  • Doodh mein zaitoon ka tail mila ker peenay say chehray ki rangat mein nikhaar paida hota hai.
  • Corn flour, doodh aur lemon juice ko mila ker paste bna lain. Is paste ko chehray per lagain aur chehray mein nikhaar paida karain.

Chehray kay daanay:

  • Chehray per danay/pimples nikal ain tou rogan e zaitoon aur rogan e kaddo braber miqdaar mein mila ker chehray per massage karain.
  • 2 say 3 spoons tulsi kay pattay lay ker unko 10 say 20 minute kay liye ubaltay paani mein daal ker ubaal lain. Jub paani thanda ho jaye tou danay kay nishan per cotton ki madad say lagain.
  • Chehray ko paani say geela ker kay iss per phittkari ka halkay halkay massage karain. Danay khatum ho jain gay.

Chehray ki chaaiyaan door kerna:

  • Chehray ki chaaiyaan door kernay kay liye leemoon ka istemaal karian
  • Aik leemoon ka rus, ½ teaspoon haldi powder, 2 tablespoon baison lain aur mila ker paste bna lain. Is mask ko chehray per lagain. 2 say 3 baar kay istemaal say chehray ki chaiyaan door ho jain gi.
  • Aik saib (apple) ko pees lain aur iss mein haldi, lemoon ka rus aur arq e gulaab mila ker paste bna lain. Chehray per lagain aur chehray ki chaaiyoon say nijaat pain.

Saaf Shaffaf chehra:

  • Kharboozay kay beej pees ker chehray per laganay say chehra saaf shaffaf ho jata hai.
  • Leemon kay rus mein kacha doodh mila ker chehray per lagain. Kuch he din kay istemaal say chehra saaf shaffaf ho jaye ga.

Chikna Chehra:

  • Multani mitti lay ker raat bher kay liye bhigo dain. Subah iss mein shehed aur arq e gulab mila ker chehray per lagain. Jild ki chiknahat door ho jaye gi.
  • Baisan mein haldi, leemoon ka rus aur doodh mila ker paste tayyar ker lain. Chehray per lagain aur khushk honay per dho lain. Chikahat door ho jaye gi.
  • Arq e gulaab say chehra dhonay say jild ki chiknahat door ho jati hai.
  • Aik anday ki sufaidi lain aur iss mein kuch qatray leemoon ka juice mila ker achi terha phaint lain. Iss mask ko chehray per lagain aur khushk honay dain. Khushk honay per thanday paani say dho lain. Chiknee jild kay liye nihayat mufeed mask hai.

Chehray ki Khushki:

  • Aik anday ki zardi mein narial ya zaitoon ka oil mila ker phaint lain k jhag bun jaye. Iss mask ko chehray per lagain aur 15 minute kay baad dho lain. Iss say jild ki khuskti door ho jaye gi aur jil naram o mulaim ho jaye gi.
  • Glycerin mein arq e gulab aur leemoon ka rus mila ker chehray per laganay say chehray ki khushki door ho jati hai.
  • Leemoon ka rus doodh mein mila ker khush jild per laganay say jild naram o mulaim ho jati hai.
  • Multani mitti mein haldi aur rogan e badaam mila ker paste bna lain. Isko chehray per lagain aur khushk honay per saaf ker lain.
  • Zaitoon ka tail, arq e gulab aur lemon ka rus mila ker laganay say chehray ki khushki door hoti hai.

Chehray per Jhuriyan:

  • Chehray per jhurriyan kum kernay kay liye shehad 10 min kay liye chehray per lagain aur dho lain.
  • Arq e gulab mein ragan e badaam, pisi hoi phitkari aur anday ki sufaidi lay ker sub cheezoon ko mila lain. isko itna pakain kay marham tayyar ho jaye. Phir chehray per lagain aur maalish karain. 15 din mein faida ho ga.
  • Kheeray aur leemoon ka rus mila ker laganay say chehray per jhurriyan nahi perti aur chehray ba ronaq rehta hai.
Categories :

Comments are closed.

Translate »