Totkay for Hair

Her mard aur aurat khoobsoorat baaloon ka khawahishmand hota hai. Larkiyan ziada ter apnay baaloon kay baray mein bohut fiker mand rehti hain aur unki nighedaasht kay liye mukhtalif tips aur totkay bhi istemaal kerti rehti hain. Akser khawateen baaloon kay girnay, khushki aur dosray masail ka shikaar nazar ati hain. Kuch log kisi beemari ki wajha say in masail ka shikar ho jatay hain aur kuch ko wirasat mein yeh sub masail miltay hain. Baaz dafa mausami asraat bhi balloon ki khoobsorti ko mutasir kertay hain. Ager aap bhi apnay baloon kay kisi mislay ki wajha say pareshaan hain tou iss chooti si tehreer ko parhain, yaqeenan apko apnay baloon say mutaliq kisi bhi qisam kay mislay ka solution mil jaye ga. Zail mein baloon ki khoobsorti aur nashonuma kay liye mufeed totkay btaye ja rahay hain. Umeed hai apko faida ho ga:

Khushki kay liye totkay:

Akser mard aur khawateen baloon mein khushki ki shikayat kertay nazar atay hain. Inhi kay liye kuch mufeed tips aur totkay darj zail hain:

  • Kafoor aur khopray ka oil mix ker k laganay say khushki khatum ho jati hai. Khopray kay oil mein kafoor mamooli si miqdaar mein daal lain aur aik bottle mein mix ker k rakh lain aur rozana raat ko sonay say pehlay laga liya karain. Khushki mein kami ho jaye gi.
  • 2 khanay kay chamach, meethi dana lain aur inko raat bher kay liye paani mein bhigo dain. Subah isko chaan lain aur paste bna lain. Iss paste ko sir per aadhay ghantay kay liye lagain aur baad mein soap-nut kay solution say sir dho lain. Haftay mein 2 baar yeh amal dohrain, khushki khatum ho jaye gi.
  • Khushki ko khatum kernay kay liye baloon mein namak lagain aur massage karain. Iskay baad shampoo ker lain.
  • Tulsi aur neem kay pattay lay ker paani mein ubaal lain. Iss pani say sir dho lain. Yeh amal rozana kernay say khushki khatum ho jaye gi.
  • Neem ka juice ¼ cup, khopray ka doodh ¼ cup, chokander ka juice ¼ cup aur 1 chaye ka chamach khopray ka oil lain. In tamam ajza ko mix karain aur sir ki jild per lagain. 20 minute kay liye laga rehnay dain aur phir shampoo ker lain. Haftay mein 1 bar istemaal kernay say khushki kum ho jaye gi.
  • 2 teaspoons baking soda lain aur paani kay chand qatroon mein mix ker lain. Ab iss paste ko sir ki jild per lagain aur kuch dair k liye massage karain. Phir shampoo ker lain. jald he ferq paray ga.
  • Lemmon ka juice lain aur sir ki jild per lagain. Chahain tou leemoon kay chiloon say sir ki jild per massage karain. 15 say 20 minute kay liye sir ki jild per laga rehnay dain aur sir dho lain.

Girtay baloon kay liye totkay:

  • Sarsoon ka oil aur henna kay pattoon ko garam ker lain. Uss waqt tuk garam karain jub tuk pattay brown na ho jain. Is oil ko chaan lain aur rozana baloon mein massage karain. Girtay baloon ka masla khatum ho jaye ga.
  • Aik lemon ka juice aur aik adad anda lain aura chi terha mix ker k sir per laga lain. 1 ghantay kay baad sir dho lain. Iss say baal mazboot hon gay aur girna kum hoon gay.
  • Lemon kay chilkay raat bher k liye paani mein bhigo lain aur subah uth ker iss say baal dho lain. Bal mazboot aur chamakdaar hon gay.
  • Aik pao massor kid al mein aik adad anda mila ker chaaon mein khushk kernay k liye rakh dain. Khushk ho janay pe is ko pees ker rakh lain. Iss say sir dhonay say baal girna kum ho jatay hain.
  • Haftay mein 3 din baal dhonay say pehlay sarsoon aur castor oil mila ker baloon mein lagain. Iss say baal girna kum ho jain gay.

Lambay baaloon kay totkay:

  • Lambay baloon k laye sarsoon ka oil bohut mufeed hai. Nahanay say 2, 3 ghantay pehlay sarsoon ka oil baloon mein lagain aur baal dho lain. Baal ghanay aur lambay ho jain gay.
  • Khoopray kay oil ko garam ker kay baloon mein massage karain. Is ko kum say kum 2 ghanatay baloon mein laga rehnay dain aur phir baal dho lain. baal mazboot aur lambay ho gay.
  • Amla aur lime juice braber miqdaar mein lain aur sir per massage karain. Iss ko shampoo ki terha istemaal kernay say baal lambay bhit hotay hain aur girna band bhi ho jatay hain.
  • Kalay maash aik cup, amla ½ cup, meeti kay beej 2 khanay kay chamchay, leemoon kay khushk chilkay 4 adad.  In tamam ajza ko pees lain. Istemaal say pehlay garam pani mein bhigo ker rakahin aur 30 minutes kay baad sir per lagain. 5 minute kay baad sir dho lain. Iss kay istemaal say baal lambay aur chamak daar ho jain gay.

Split ends khatum kernay kay totkay:

  • Split ends ki sab say bari wajha baaloon ki dryness aur moisture ka na milna hai. Iss liye sub say umda  aur aasan hal anday ka istemaal hai. Baloon mein anda lagain aur inki dullness ko khatum karain.  Anday mein zaitoon ya badam ka oil mix ker k 30 say 45 minute tuk laga rehnay dain. Iskay baad dho lain.
  • Papeetay kay pulp aur dahi ko mix karain aur smooth paste bna lain. 30 minute tuk iss paste ko laga rehnay dain aur phir dho lain.
  • Castor oil mein sarsoon aur zaitoon ka oil mix ker kay massage karain. 30 minute tuk laga rehnay dain aur phir sir dho lain.
  • Baaloon mein balaai aur dhoodh ka mixture lagain aur 15 minute kay baad baal dho lain.
  • Mayonnaise, bhi split ends ko kum aur khatum kernay mein bohut madad gar hai.
  • Aik kaila lain aur isko mash ker lain. Iss mein shehed, doodh aur aik anda mila lain. Isko ko mix karain aur mixture ko baloon mein lagain. Aadhay ghantay kay baad dho lain.
Categories :

Comments are closed.

Translate »