Leucorrhea Causes and Treatment in Urdu

Leucorrhea bachadaani sai safed ya peeli moti ratoobat kai nikalne ko kehte hain. Is ki bunyaadi wajah jism main estrogen kai levels main farq hona hota hai.Kissi bhi kisam kai infection ki wajah sai yeh ratoobat barh jati hai. Jab ratoobat ka barhna infection ki wajah sai ho to leucorrhea peela ho jata hai aur badbuu barh jati hai. Yeh samajhna zuroori hai kai leucorrhea ka zaahir hona aik alaamat hai jo nishandahi karti hai kai koi infection ho raha hai.

Bachadaani sai ratoobat ka ikhraaj jism ka aik aam amal hota hai, aur har aurat main yeh amal mukhtalif tareeqe sai hota hai. Laikin yeh zuroori hai kai leucorrhea hone ki bunyaadi wajah ko samjha jaye. Leucorrhea hone kai doosre awaamil main infection, rasooli ya hormones main tabdeeli hain. Choti larkion main jin main pehli baar mahwaari ho rahi ho, ratoobat khaarij hoti hai jo balooghat ki nishandahi karti hai.

Leucorrhea aurton main payee jani wali aik aam halat hai. Laikin khawateen is maamle main buhat pareshan rehti hain. Leucorrhea ki bunyaadi wajah bacha daani ka geela rehna hota hai jis ki wajah sai is main infection ka moqa barh jata hai. Leucorrhea sai paida hone waali badboo asal main khawateen to pareshan karti hai jis sai maamoolate zindagi mutaassir hote hain. In khawateen main ehsaases kamtari hone ka moqaa barh jaata hai, is liye zuroori hai kai khawateen ko munasib mashwara diya jaye aur un ko tasalli di jayee. Aik khatoon jis main koi bemarri mojood na ho, us main leucorrhea safed aur chipka hoa hota hai. Is ki khusoosiat nazle jaisi hoti hai. leucorrhea mahwari kai mukhtalif augaat main bhi ghatti barhti rehti hai.

Jab leucorrhea main kissi bhi kisam kai khoon, badboo yar rang badalne kai awamil hon to doctor sai mashwara karna buhat zuroori hai. Doctor sahee tareeqe aur mukhtalif tests sai leucorrhea ki nauyeeat ka andaaza laga kar sahee ilaaj tajweez kar sakta hai.

Leucorrhea main ilaaj na karwane ki bunyaadi wajah sharam hoti hai. Buhat si khawaateen khaas tor par choti bachiyaan doctor sai rujuuh karne main sharmaati hain. Is liye zuroori hai kai in bachion ki sahee rehnumai ki jaye aur un ko un ki sehat kai mutaaliq sahee maaloomat di jayeen.

Categories :
Tags :

Comments are closed.

Translate »