Benefits of Green Tea for Skin in Urdu- Sabz Chaye Jild Ki Hifazat k Liye

Qudrat nay insaan ko bohut si naimatoon say nawaza hai. Insaan inko shumaar kernay baithay tou shumaar na ker paye. Bohut si naimatoon ka tou insaan ko shaid ilm bhi na ho. Mager joon joon waqt guzer raha hai insaan bohut si cheezain jo hamaray liye qudrat ka anmol tohfa hain ko dhoond chuka hai. Inn he mein say aik naimat hai “sabz chaye” yani “green tea”.

Hazaroon saaloon say insaan sabz chaye (green tea) say na sirf lutf andooz ho raha hai balkay iss kay sath sath la tadaad fawaaid yani benefits se bhi mustafeed hoo raha hai. Shaid hazaroon saal pehlay ka insaan isko aik gharailoo totkay kay taur per istemaal kerta tha mager aaj kay daur mein jadeed sciency tehqeeq say yeh baat sabit ho gai hai keh sabz chaye la tadaad khobiyoon aur fawaid  ki wajha say zamana e qadeem say istemaal ki ja rahi hai aur shaid anay walay waqt mein insaan iss k baray mein mazeed tehqeeq say iski kuch aur khobiyoon ko dhoondnay mein kamyaab ho jaye.

Iss tehreer ka maqsad sabz chaye yani green tea ki bohut si khoobiyon (benefits) mein say chund khas khobiyaan jo khawateen ki jild yani skin k liye intehaai mufeed hain k baray mein apko btana hai.

Sabz Chaye kay fawaid Aur Jild Ki Hifazat:

  • Sabz Chaye (green tea) jild (skin) mein jalan(inflamation) ya kharish(rash) paida kernay walay masail (problems) k liye nihiyat mufeed hai.
  • Sabz chaye k pattay, halki kharaash, kharish, daag aur dhabboon ko door kernay k liye bhi bay hadd faida mund sabit hoye hain.
  • Apko aur apki jild ko dair paa khoobsurati aur jawan nazer anay mein apki madad kerti hai.
  • Unn tamaam anasir ko jo k apko borhapay ki taraf lay jatay hain, ko kum kernay mein intehaai faida mund hai.
  • Chehray pe daanay(pimples), keel muhasay(acne) kum kernay mein bay hadd madad gaar sabit hoti hai
  • Soraj ki roshni say paida honay walay masail k liye bhi karamad sabit hoti hai
  • Jild k sartaan(cancer) say bachao k liye leemoon (lemon) ka russ mila k sabz chaye(green tea) istemaal ki jati hai. Jo k nihaayat mufeed bhi samjhi jati hai.
  • Sabz chaye, unn logo k liye bhi bay hadd mufeed hai jin ko khushki(dandruff) ki shikayat ho. Khushki(dandruff) chahay baloon(hair) mein ho ya jild per, sabz chaye kay istemaal say kaafi hadd tuk iss maslay per qaboo paya ja sakta hai.
  • Garmiyoon kay mausam mein, ager sab chaye ki pattiyoon(leaves) ko kuch dair paani mein bhigo(dip) k rakh dain aur baad mein paani ko fridge mein rakh diya jaye tou jub bhi aap dhoop ya garmi say ghar ain iss paani ko apnay chehray per roi(cotton) ki madad say laganay say ya chiraknay(spray) say apki jild taro taza ho jati hai. Iss k ilawa aankoon(eyes) ko thandak pohanchanay k liye bhi yeh nihayat karamad nuskha(remedy) hai.
  • Chehray k ronaq bahaal kernay k liye aur jild ko narm o mulaim kernay k liye, 3 tbspoon mayonnaise mein 1 tsp sabz chaye mila ker mask tayyar ker lain aur 15 say 20 minute tuk chehray per laga rehnay dain. Phir paani say dho lain aur koi bhi acha moisturizer lagain ager apko chehra khushk mehsoos ho.

Bohut say log jo k bohut si creams aur dawaain(medicines) aur totkay istemaal kernay k bawajood matlooba nataij hasil nahi ker patay, ab woh qudrat ajza k istemaal ki taraf maayel ho rahay hai. Sabz chaye yani green tea bhi unn mein say aik hai Ager ap iss kay istemaal aur iskay qudrati fawaid(benefits) say na waqif thi tou yeh tehreer yaqeenan apkay liye bay hadd karamad hai. Aaj he sabz chaye ko apni zindagi ka hissa bnaian aur iss k laa tadaad fawaid say mustafeed hoon Bohut si khawateen apni jild ki hifazat k liye iss qudrati tohfay ko isstemaal ker k faida hasil ker chuki hain ap bhi unn mein shamil honay k liye aaj he sabz chaye ka istemaal shuru karain aur taro taza nazer ain.

Categories :

Comments are closed.

Translate »