Dulhan (Bridal) Makeup Tips in Urdu / Hindi

Koi bhi larki jis din ka sub say shiddat say intizar karti hai wo uss ki shaadi ka din hota hai. Iss eham tareen din kay liye uss nay kayi khwab apni aankhon mei sajaa kay rakhay hotay hain. Shaadi kay din say mutallik aik eham faisla iss baat ka hota hai kay dulhan yani bride ka makeup kahan say karwaya jaye. Iss kay liye khawateen shaadi say pehlay he beauty parlors say ruju kerti hain. Beauty parlors mein who mukhtalif services kerwati hain  taa kay shaadi kay din tuk unki jild chahay who chehray ki ho ya jism kay dosray hissoon ki, saaf aur khoobsurat dikhaai day sakay. In tamam services mein facial, manicure, pedicure, waxing, hair treatment wagaira. Beauty parlors per dulhanon (brides) ko unki jild kay mutabiq mukhtalif treatments di jati hain taa kay woh shadi kay din khoobsoorat aur haseen nazer ain aur baad mein bhi. Dulhan kay makeup (bridal makeup) ko khoobsurat bananay kay liye chand tajaweez ko zair-e-ghor rakhna zaruri hai.

Dulhan /Bridal Make-up Tips: 

1)      Makeup karnay say pehlay moisturizer zaroor lagayen. Aankhon ko numayaan karnay kay liye corrector aur concealer ka istimaal karain.

2)      Makeup ko behtareen hona chahiye aur dair paa bhi, kiyun kay yeh aapkay khaas din ka ka makeup hai aur taqreeban poora din he apko shaadi kay joray aur makeup mein guzarna hota hai iss liye galati ki koi gunjaish nahi hoti.

3)      Agar aap ka rang bohat gora hai, tou zaada foundation ya base laganay say guraiz karain. Makeup agar jild ki rangat ko madd-e-nazar rakh kar na kiya jaye tou bura lagta hai. Foundation aur concealer “tassle” ki madad se lagayen takay ye zaada dair-paa ho.

4)      Makeup kay zariye apnay chehray kay kisi aik hissay par tawajjo markooz karain. Agar eyeshade bohat gehra rang ka hai aur aankhain numayaan ho rahi hain tou gehre rang ki lipstick na lagayen. Eye-shade gehra, dhundlay (matte) rang ka hona chaiye. Eye-shade ko dair-paa bananay kay liye brush ko halka sa geela kar k aankhon pe lagayen.

5)      Blush-on ka intikhaab apni jild ki rangat kay hisaab say karain. Blush-on kay liye hamesha neutral colors istimaal karain takay wo tasweeron mei gehra na lagay. Blush-on gaalon ki haddi se lagana shuru karain aur hairline tuk le jayen aur phir neechay tuk le ayen.

6)      Gulaabi aur laal rang ki lipsticks aam tor par dulhan (bride) par zaada istimaal ki jati hain. Lipstick ko dair-paa bananay kay liye honton ko pehle lip-liner se zarur numayaa karain.

7)      Mascara aur liner aisa istimaal karain jo water-proof ho. Mascara laganay say pehlay eyelash curler zaroor lagayen.

8)      Gaalon, naak aur chin ki contouring zaroor karain. Contouring wo amal hai jis say chehray kay behtereen hisson ko numayaa banaya jata hai. Double chin aur bari naak jaisi khaamiyan contouring kay zariye ba-aasani chupaai ja sakti hain.

Inn tamaam tips ka khayaal rakh k aap apni shaadi kay roz nihayat haseen aur khoobsoorat dulhan dikhaai day sakti hain. Ager aap apni beautician kay sath bhi inn sub bridal makeup tips ko discuss karain tou aap yaqeenan apni shaadi kay din haseeen nazer aain gi.

Categories :

Comments are closed.

Translate »