Eye Makeup Tips in Urdu/ Hindi – Ankhon Ka Makeup

Aankhain yani eyes chehray ki aina daar hoti hain. In ankhon ya eyes ki  khoobsurti ko mazeed ubhaarnay kay liye makeup ka sahi istemaal kerna bohut zaroori hai. Chehray ki khoobsorti ka inhesaar makeup kay sahi istemaal per hota hai aur makeup mein sub say ahem kirdaar annkon k makeup ka hota hai. Aankhain yani eyes behter andaaz mein lagaye gaye eye shadow ya rung ki wajha say hoti hai. Ankhoon ki khobsorti mein izafa kernay k liye mukhtalif Rangoon ki madad li jati hai. Yeh rung ager achay tareeqay say istemaal kiye jain tou apko mazeed dilkash aur haseen bna saktay hain.

Eye Makeup Tips in Urdu

Zail mein aankoon per makeup kay sahi istemaal ki chund tips Urdu zuaban main darj hain jin per amal ker kay aap na sirf khobsurat dikhaai day sakti hain balkay her taqreeb ki jaan bun sakti hain.

  • Din k waqt ager apko kaheen bahar, dafter ya kisi taqreeb mein jana ho tou ziada eye cream ka istemaal na karain. Iss kay ilawa halkay rungoon ka intekhaab kerna behter hota hai kiyun kay din ki roshni mein halkay rung ziada achay lagtay hain aur aap ka chehra qudrati husn ka maalik nazer aata hai.
  • Raat k waqt agrer kis shadi ya doosri taqreeb mein shirkat kerna ho tou behter hai kay aap kay aap gehray ya chamakdaar Rangoon ka intekhaab karain. Raat kay waqat aisay rung bohut achay lagtay hain aur apki khoobsoorti mein izafay ka baiis buntay hain.
  • Aankho ki bnawat ko madd e nazar rakhna bhi bay had ahem hai. Chooti aankho wali khawateen ko halkay rung ka instemaal kerna chahiye iss  say unki aankhain qadray bari aur khushnuma nazer aati hain.
  • Eye shade ki khobsorti mein izafa kernay k liye unko achi terha mix ya blend kerna bhi ahem baat hai. Halkay aur gehray Rangoon kay imtezaaj say aankon per khoobsorat rang lagaye ja saktay hain jo apko bay panah haseen dikhnay mein madad gaar sabit hotay hain.
  • Mayari brush ka hona bhi ahem nukta hai. Eye shadow brush ager mayari na ho tou makeup kay doraan ya baad mein apko aankho per jalan ya koi aur infection honay ka khatra rehta hai. Iss kay saath sath acha brush apko makeup kernay mein madad kerta hai.
  • Aik ahem baat yeh hai k ager apkay libaas ka rung gehra hai tou eye shadow hargiz gehra na ho. Halka ya darmayana rung bohut bhala maloom hota hai.
  • Halkay rung kay libaas k sath gehra eye shadow laga ker aap apni khoobsorti mein izafa ker sakti hain.
  • Eye makeup mukammal ho jaye tou aankhon mein kaajal aur bayrooni hissay per eye liner laga ker ap apni aankoon ko saher angaiz had tuk khobsorat bna sakti hain
  • Aakhir mein mascara laga ker ap apna eye makeup mukammal ker sakti hain. Maskara apki palkoon ko mazeeb khobsorat bnata hai. Mager mayari maskaray ka intekhaab bohut zaroori hai.
  • In tamaam ahem baton ka khayal rakh k aap apni aankhoon ko makeup kay zariye khobsorat aur dilkash bna sakti hain. Yaad rahay kisi bhi kisam ki rahnumaai ya madad k liya mahir beautician say mashwara kerna bohut behter aur karamad sabit hota hai.
Categories :

Comments are closed.

Translate »