Wedding Makeup Tips in Urdu / Hindi

Shaadi ka din kisi bhi larki kay liye zindagi ka aham tareen din hota hai. Iss din na sirf woh aik nai zindagi shuru kernay ja rahi hoti hai balkay bachpan say hee uski yehi khawahish hoti hai keh who apni shaadi kay din sub say hassen aur khoobsoorat nazar aiye. Iss kay liye tayyariyaan kuch maheenay pehlay say he shuru ho jati hain. Terha terha kay totkay, beauty tips, beauty parlor kay chakker, khanay peenay ki ehtiyaat aur na janay kiya kiya.

Yeh tou dulhan ki tayaari kay marahil hain mager aaj kal kisi bhi shaadi ki takreeb mein shamil honay k liye her aurat ya larki bhi bherpoor tayyari k sath shamil hona chahti hai. Acha lagna tou her insaan ka haq hai. Aur shaadi bayah ki taqareeb mein tou saj sanwar ker jana acha bhi lagta hai. Akser khawateen iss silsilay mein pareshan nazer aati hain kiyun k sub he haseen dikhaai dainay kay chakker mein akser kuch iasi galatiyan ker baithti hain keh acha lagnay ki bajaye buri lagti hain aur apnay ander aitemad ki kami mehsoos kerti hain.

Is chotay say article ka maqsad apko aisi he chand tips say agah kerna hai jin per amal ker k aap bay had haseen dikhaai day sakti hain:

  • Sub say pehlay tou apni jild ka khas khayal rakhain, achi terha scrubbing karain, dead skin aur gard o gubar say nijaat hasil karain taa kay aap jub makeup karain tou makeup aur bhi acha lagay.
  • Shaadi ki taqreeb mein janay say kum say kum 1 ghanta pehlay tayyari shuru karain. Taa kay jub aap makeup mukamaal karain tou apki foundation/base bilkul set ho gai ho aur jub ap taqreeb mein shirkat kay liye wahan phnachain tou sub kuch bohut acha lag raha ho.
  • Makeup kernay kay liye sub say pehlay chehray ko achi terha dho lain aur khushk ker kain. Ager waqt milay tou cleansing ker lain taa kay jild bilkul saaf ho jaye aur makeup bhala maloom ho.
  • Foundation say aaghaaz karain aur chehray aur gardan per achi terha foundation lagain. Dayhaan rahay apkay chehray ka koi hissa rehna jaye. Foundation hamesha apni jild ki rangat kay hisaab say lain aur garmi kay mausam mein water base he istemal karain aur aakhir mein face powder zaroor lagain taakay paseenay say makeup beh ya kharaab na ho jaye.
  • Ab eye makeup ki taraf aain. Apni aankh ki shape aur libas kay rung madd e nazar rakhain aur eye shade ka intekhaab karain aur highlighter lagain. Isskay bad eye lash glue ki madad say lagain aur glue khushk honay ka intezaar karain. Apni palkoom aur aankhoon kay hisab say eyelash kay size ka intekhaaz karain ayr masqarra ki madad say acha sa curl karain. Ab aakhir mein liner lagain.
  • Blush on chehray ki haddiyon ki seedh mein lagain aur chahain tou shimmer bhi lagain tou makeup aur bhi haseen nazer aata hai.
  • Ab contouring karain aur chehray ki khamiyoon ko chupain.
  • Aakhir mein lipstick lagain. Lipstick laganay say pehlay lip liner lagain aur phir lipstick lagain. Chahain tou lip gloss bhi lagain tou hont aur bhi khoobsoray ho jatay hain.
  • Aakhir mien aik nazer chehray kay her hissay per daliain aur koi kami ho tou door karain.
  • Sub say aakhir mein baal bnain aur jewelry pehan ker tyaari mukammal karain aur pur aitemaad tareeqay say shadi ki taqreeb mein shirkat karain.

Zara si ehtiyaat apko haseen nazer anay mein madad gaar sabit ho sakta hai iss liye in cheezon per tawajjah daina zaroori hota hai.

Categories :

Comments are closed.

Translate »